Андижонда ҳайдовчи ЙПХ ходимига мушт тушириб, бурнини синдирди — видео
Гувоҳномасиз машина бошқарган ҳайдовчи автомобили жарима майдонига қўйилаётганлигидан жаҳли чиқиб, ходимга жароҳат етказган.
Ички ишлар вазирлиги Андижон вилоятида ҳайдовчи йўл-патрул хизмати ходимини уриб, бурнини синдирган ҳайдовчига нисбатан жиноят иши қўзғатилгани ҳақида хабар берди.
Воқеа 12 июл куни тахминан соат 11:00 атрофида содир бўлган. ЙПХ инспектори Labo автомашинасини тўхтатган. Текширувда ҳайдовчининг ҳужжатларида камчиликлар аниқланган, ҳамда машина жарима майдончасига олиб борилиши маълум қилинган. Ҳайдовчининг бундан жаҳли чиқиб, ходим билан жанжаллашиб, унинг юзига бир мушт туширган.
Суд-тиббий экспертизасининг дастлабки маълумотига кўра, ходимга бурун синиши ёпиқ ташхиси билан енгил тан жароҳати етказилганлиги аниқланган. Ҳолат юзасидан Андижон шаҳар прокуратураси томонидан Жиноят Кодексининг 219-моддаси 2–қисмига асосан, жиноят иши қўзғатилиб, тергов ҳаракатлари олиб борилмоқда.
