Россияда паспортини олдириб қўйиб, ойликсиз ишлаган 12 нафар ўзбекистонлик ватанга қайтарилди
Иш берувчи ҳужжатларни расмийлаштириш учун ўзбекистонликларнинг паспортларини олиб, уларни бир неча ой давомида ойлик бермасдан ишлатган.
Ташқи меҳнат миграцияси агентлиги Россияда паспортини олдириб қўйиб, бир неча ой иш ҳақисиз ишлаган ўзбекистонлик 12 кишини Ўзбекистонга қайтарилгани ҳақида хабар берди.
Бир гуруҳ ўзбекистонликлар иш берувчиси ойлик маоши ва паспортларини бермай, яшаб турган хостелидан чиқариб юборгани юзасидан агентликка мурожаат йўллаган. Агентликнинг қайд қилишича, улар ижтимоий тармоқлардаги ёлғон маълумотларга ишонган. Чувашия Республикасининг Чебоксари шаҳрида нон ва қандолат маҳсулотлари ишлаб чиқариш цехига автобусларда ишлаш учун борган.
Иш берувчи ҳужжатларни расмийлаштириш учун ўзбекистонликларнинг паспортларини олиб, уларни бир неча ой давомида ойлик бермасдан ишлатган.
Ташқи меҳнат миграцияси агентлиги ваколатхонаси, Ўзбекистонинг Қозон шаҳридаги Бош консулхонаси ва ўзбек диаспораси вакиллари фуқароларни хостелга жойлаштирган ва иссиқ овқат билан таъминлаган.
Бош консулхона фуқароларнинг бир гуруҳига ватанга қайтиш сертификатини расмийлаштириб бериб, Ўзбекистонга қайтарди.
