Экология, атроф-муҳитни муҳофаза қилиш ва иқлим ўзгариши вазирлиги Сирдарё шаҳрида фаолият юритувчи мебел корхонаси раҳбари ишчи ёллаб, Тошкентда иккита чинорни кестиргани ҳақида хабар берди.

Қайд қилинишича, Юнусобод тумани 7-мавзеси, «Астробод» МФЙ ҳудудида Сирдарё вилояти, Сирдарё шаҳрида фаолият юритувчи мебел ишлаб чиқаришга ихтисослашган МЧЖ раҳбари икки нафар ишчи ёллаб, икки дона чинор дарахтини кестирган. Бунинг оқибатида табиатга 204 миллион 105 минг сўм зарар етказилган.

Тегишли ҳужжатлар ҳолатга ҳуқуқий баҳо бериш ва керакли чора-тадбирларни кўриш мақсадида ҳуқуқни муҳофаза қилиш органларига юборилган.

Аввалроқ Жиззахда 3 туп дарахтни ноқонуний кесган эркак табиатга 25,7 млн сўм зарар келтиргани, Самарқандда 55 йиллик Қайрағоч дарахтлари кесиб ташлангани ҳақида хабар берилганди.