Россиянинг Ставропол шаҳрида полиция ўзбекистонликларни деҳқончилик қилишга мажбурлаб келган икки шахсни қўлга олди. Шпаковский туманидаги «Авиатор» қишлоғида яшовчи пенсионер икки таниши билан бирга Россияда ноқонуний яшаб келган ўзбекистонлик 31 ёшли эркак ва 27 ёшли аёлни номаълум шахслардан 20 минг рублга сотиб олган.

Катта ёшли пенсионер эркак ва унинг шериклари ўзбекистонликларни 6 ой давомида деҳқончилик қилишга мажбурлаган. Ҳолат юзасидан ноқонуний озодликдан маҳрум қилиш факти аниқланиб, икки киши ҳибсга олинган. Учинчи шерик июл ойи охирида вафот этгани айтилган.

Нафақадаги шахсга нисбатан «Одамни ўғирлаш билан боғлиқ бўлмаган қонунга хилоф равишда озодликдан маҳрум қилиш» ва «Ноқонуний миграцияни ташкил этиш» моддалари бўйича жиноий иш қўзғатилган – ҳозирда у билан тергов олиб борилмоқда, иккинчи гумонланувчи уй қамоғида. Одам савдогарлари полиция томонидан қидирилмоқда.

Эслатиб ўтамиз, шунга ўхшаш яна бир ҳолатда Ҳиндистон полицияси рейдлари давомида қўлга тушиб, ҳибсга олинган ҳамда бошқа кўплаб нохуш воқеаларни бошидан кечирган ўзбекистонлик аёл билан содир бўлганди. Аёл ёлғон ваъдалар таъсирида Ҳиндистонга келгач, иш ваъда қилган кимсалар томонидан унинг шахсий ҳужжатлари олиб қўйилиб, қулликда сақланган, у таҳдид ва қўрқитишлар орқали фоҳишалик билан шуғулланишга мажбур қилинган.

2021 йил октябр ойида ўзбекистонлик уч нафар аёл Ҳиндистон-Непал чегарасидан ноқонуний ўтаётганда қўлга олиниб, ҳибсда ушлаб турилганлигини ҳабар қилганди.