Кинокарвон акцияси Қорақалпоғистонда давом эттирилди
Ушбу тадбир «Янги Ўзбекистоннинг янги кинолари» ойлиги доирасида ўтказилмоқда.
Ўзбекистон мустақиллигининг 32 йиллиги муносабати билан республика бўйлаб ўтказилаётган «Янги Ўзбекистоннинг янги кинолари» ойлиги доирасида ташкил этилган кинокарвон Қорақалпоғистоннинг Нукус шаҳрига етиб борди. Бу ҳақда Миллий кинематографияни ривожлантириш маркази матбуот хизмати хабар берди.
Маълум қилинишича, кеча, 5 сентябр куни шаҳардаги шимоли-ғарбий ҳарбий округида кинокарвон акцияси доирасида маънавий-маърифий тадбирлар бўлиб ўтган.
Тадбир доирасида Анвар Азимов, Зуҳриддин Режаметов, Фотима Режаметова, Дилшодбек Каттабеков, Анжелика Эсимбетова каби таниқли киноижодкорлар аҳоли вакиллари билан кўришиб, ижодий учрашувлар ташкил этган. Шунингдек, Зулфиқор Мусоқовнинг «Осмондаги болалар 3» фильми намойиш этилган.
Маълумот учун, 15 август куни бошланган киноойлик 15 сентябрга қадар давом этади.
Эслатиб ўтамиз, 2022 йилда ҳам Наврўз байрами муносабати билан республика бўйлаб кинокарвон акцияси ўтказилганди. Шунингдек, 2022 йилнинг апрел ойида Маданият ва санъат ходимлари куни муносабати билан кинокарвон тадбирлари ташкил этилган.
