Ўзбекистонда майнинг фаолияти билан шуғулланиш учун рухсатнома қайси ташкилот томонидан берилиши айтилди
«Лицензиялаш, рухсат бериш ва хабардор қилиш тартиб-таомиллари тўғрисида»ги қонунга ўзгартиришлар киритилди.
Шавкат Мирзиёев томонидан имзоланган қонун асосида айрим қонун ҳужжатларига қўшимча ва ўзгартиришлар киритилди.
«Давлат божи тўғрисида»ги қонунга киритилган ўзгартиришга кўра, крипто-активлар айланмаси соҳасидаги хизматлар провайдерлари фаолиятини амалга ошириш учун лицензия олаётган юридик шахслар давлат божини Истиқболли лойиҳалар миллий агентлиги томонидан белгиланадиган миқдорда ва тартибда тўлайди.
Шунингдек, «Лицензиялаш, рухсат бериш ва хабардор қилиш тартиб-таомиллари тўғрисида»ги қонунга ҳам ўзгартиришлар киритилган.
Унга кўра, майнинг фаолиятини амалга ошириш учун рухсатнома Истиқболли лойиҳалар миллий агентлиги томонидан берилади.
Истиқболли лойиҳалар миллий агентлиги Президент Шавкат Мирзиёевнинг фармонига мувофиқ ташкил этилган. Агентлик юридик шахс ҳуқуқига эга, давлат раҳбарига ҳисоб берувчи давлат муассасаси ҳисобланади. Агентлик крипто-активлар айланмаси соҳасини ривожлантириш, мазкур соҳадаги фаолиятни лицензиялаш ва тартиб-таомиллари жараёнлари бўйича ваколатли орган ҳисобланади.
