«Ўзгидромет» ҳафта давомида кузатиладиган об-ҳаво маълумотини эълон қилди
Ҳафта охирига қадар кам булутли ва қуруқ об-ҳаво кузатилади.
«Ўзгидромет» янги ҳафтада кутилаётган об-ҳаво маълумотини эълон қилди.
Қайд этилишича, бугун, 11 сентябр куни Ўзбекистон бўйича ҳаво бироз булутли бўлади, баъзи жойларда ўзгариб туради, ёғингарчилик кутилмайди, Бухоро, Навоий вилоятларининг айрим жойларида ва куннинг иккинчи ярмида Тошкент вилоятининг баъзи жойларида, республиканинг тоғолди ва тоғли ҳудудларида қисқа муддатли ёмғир ёғиши, момақалдироқ бўлиши мумкин.
Баъзи жойларда шамол тезлиги 15-20 метр/секундгача кучаяди, шимолда, жанубда ва чўл ҳудудларда 21-23 метр/секундгача кучайиши, айрим жойларда чанг-тўзон билан кузатилшиши мумкин. Ҳарорат +29…+32 даража бўлади.
Кейинчалик, ҳафта охирига қадар, республика бўйича Ўзбекистонда куз фасли боши учун хос бўлган асосан кам булутли ва қуруқ об-ҳаво бўлиши кутилмоқда.
Тоғли ҳудудларда 12-13 сентябрь кунлари баъзи жойларда қисқа муддатли ёмғир ёғиши, момақалдироқ бўлиши мумкин, 14-15 сентябрда ёғингарчилик кутилмайди.
Пойтахт Тошкентда бугун куннинг биринчи ярмида ёғингарчилик кутилмайди, куннинг иккинчи ярмида қисқа муддатли ёмғир ёғиши, момақалдироқ бўлиши мумкин, шамол тезлиги 12-15 метр/секундгача кучаяди. Ҳарорат +30…+32 даража бўлади.
12-15 сентябрь кунлари ҳаво асосан бироз булутли бўлади, ёғингарчилик кутилмайди. Шамол шарқдан 3-8 метр/секунд тезликда эсади. Ҳарорат 12 сентябрда +26…+28 даража, 13-15 сентябрда +28…+30 даража бўлади.
