Ўзбекистонда 2024 йилнинг 1 январидан бошлаб бошланғич синф ўқувчиларини таълим планшетлари билан таъминлаш жорий қилинади. Бу ҳақда «Ўзбекистон – 2030» стратегиясини ўз вақтида ва сифатли амалга ошириш бўйича президент қарорида келтирилади.

Маълум қилнишича, 2024 йилнинг 1 январидан бошлаб Хоразм вилоятининг Қўшкўпир ва Хонқа туманларида эксперимент тариқасида, барча бошланғич синф ўқувчилари таълим планшетлари билан таъминланиб, келгусида мазкур тажриба республиканинг барча ҳудудларида босқичма-босқич жорий этилади.

Қарорга, шунингдек, қуйидагилар назарда тутилган:

• давлат мактабгача таълим ташкилотлари тарбияланувчиларига оқсил, витамин ва минераллар билан бойитилган сут, йод билан тўйинтирилган нон маҳсулотлари берилиши йўлга қўйилади;
• банкларнинг нодавлат умумий ўрта таълим ташкилотлари фаолиятини йўлга қўйиш учун қиймати 20 миллиард сўмгача кредитлар бўйича, фоиз ставкаси асосий ставкадан ошадиган, лекин унинг 1,5 бараваридан кўп бўлмаган қисмини қоплаш учун компенсация тақдим этиш амалиёти йўлга қўйилади.

Бундан ташқари, 2023/2024 ўқув йилидан:

• умумий ўрта таълим муассасалари 10-синф ўқувчиларини касб-ҳунарларга ўргатиш курслари жорий этилади;
• Президент мактаблари ва ихтисослаштирилган мактаблар умумий ўрта таълим муассасалари учун “таянч мактаб” этиб белгиланади.

Эслатиб ўтамиз, аввалроқ Ўзбекистонда 1-синфдан бошлаб компьютер саводхонлиги курслари жорий қилиниши ҳақида хабар берган эдик.