Россиянинг Нижний Новогород вилоятида ўзбекистонлик 36 ёшли эркак КАМАЗ юк машинаси ёрдамида полиция бўлимига бостириб кирмоқчи бўлди. Бу ҳақда вилоят Тергов қўмитаси матбуот хизмати хабар берди.

Қайд этилишича, 2023 йилнинг 12 сентябр кунига ўтар кечаси Дзержинск шаҳридаги 2-сонли полиция бўлими яқинида КАМАЗ бошқарувидаги ўзбекистонлик эркак юк машинасига ўрнатилган манипулятор кран ёрдамида бетон блокни кўтариб, ичида ходимлар фаолият олиб бораётган полиция бўлимининг кириш қисми ва деразаларига зарба берган. Шундан сўнг у воқеа жойида қочишга уринган. Полиция бўлимида «Қалъа» режими, шаҳарда эса «Қўлга олиш» операцияси бошланган. Ҳуқуқ-тартибот идоралари ходимлари 24 марта ўқ узиб, транспорт воситасининг олдинги иккита ғилдирагини тешиш орқали уни тўхтатиб қолган.

Ҳозирда айбланувчига нисбатан Россия Жиноят кодексининг 213-моддаси (безорилик, яъни фуқароларга нисбатан зўравонлик таҳдиди билан содир этилган, жамиятга нисбатан аниқ ҳурматсизликни ифодаловчи жамоат тартибини қўпол равишда бузиш) 1-қисми «а» банди билан жиноят иши очилган.

Эслатиб ўтамиз, аввалроқ Россияда ўзбекистонлик эркак юк машинасида бир гуруҳ велосипедчиларни уриб юборганди. Ҳодиса оқибатида 2 нафар қиз ҳалок бўлган, 8 киши жароҳат олган.