Шавкат Мирзиёев келаси ҳафта АҚШга боради
Давлат раҳбари Жо Байденнинг таклифига кўра илк бор ўтказилаётган Марказий Осиё ва АҚШ (CА5+1) давлат раҳбарларининг мулоқотида иштирок этади.
Президент Шавкат Мирзиёев келаси ҳафта АҚШга ташриф буюради. Бу ҳақда давлат раҳбарининг матбуот котиби Шерзод Асадов маълум қилди.
Қайд этилишича, Шавкат Мирзиёев Бирлашган Миллатлар Ташкилотининг 78-сессиясида нутқ сўзлаши режалаштирилган. Бундан ташқари, АҚШ президенти Жо Байден таклифига биноан биринчи марта Марказий Осиё ва АҚШ (CА5+1) давлат раҳбарларининг мулоқоти бўлиб ўтади.
Шавкат Мирзиёев, шунингдек, бошқа мамлакатлар давлат ва ҳукумат раҳбарлари, халқаро молия ташкилотлари етакчилари билан учрашув ўтказиши кутилмоқда.
Эслатиб ўтамиз, Президент 2023 йилнинг 22-23 август кунлари Озарбайжон раҳбари Илҳом Алиевнинг таклифига биноан ушбу мамлакатга сафар қилганди.
