Аввалроқ Президент Шавкат Мирзиёев Бирлашган Миллатлар Ташкилотининг 78-сессиясида қатнашиш учун АҚШга бориши ҳақида хабар берилганди. Давлат раҳбари бугун, 17 сентябр куни Ню-Йорк шаҳрига етиб борди. Бу ҳақда унинг матбуот хизмати хабар берди.

Қайд этилишича, Шавкат Мирзиёевни аэропортда Ню-Йорк мэри Эрик Адамс, АҚШ-Ўзбекистон савдо палатаси раиси Кэролин Лэмм ва бошқа расмий шахслар кутиб олган.

Ташриф дастурига кўра, Президент 19 сентябр куни БМТ Бош Ассамблеяси ялпи сессиясининг умумий мунозараларида нутқ сўзлайди ҳамда минтақавий ва глобал кун тартибидаги долзарб масалалар юзасидан ўз нуқтаи-назарини баён қилади. Шунингдек, Шавкат Мирзиёев Марказий Осиё мамлакатлари ва Америка Қўшма Штатлари етакчилари саммити, хорижий давлатлар, нуфузли халқаро ташкилотлар ва АҚШнинг етакчи компаниялари раҳбарлари билан қатор икки томонлама учрашувларда ҳам қатнашиши режалаштирилган.

Эслатиб ўтамиз, аввалроқ Президент Тожикистон пойтахти Душанбеда ўтказилган Марказий Осиё давлат раҳбарларининг Маслаҳатлашув учрашувида иштирок этган эди.