Ўзбекистонда Америка технологиялар университети очилади
Университет 2024 йилдан бошлаб бир қатор соҳаларда кадрлар тайёрлашни бошлайди.
Ўзбекистонда Америка технологиялар университети очилади. Бу ҳақда Президент матбуот хизмати хабар берди.
Қайд этилишича, Президент Шавкат Мирзиёев АҚШга амалий ташрифи давомида Cintana компанияси раҳбари Дуглас Беккер билан учрашув ўтказган. Дуглас Беккер АҚШнинг Аризона университети билан ҳамкорликда Ўзбекистонда Америка технологиялар университетини очиш устида иш олиб бораётгани маълум қилинди. Университет 2024 йилдан бошлаб соғлиқни сақлаш, инжиниринг, архитектура ва дизайн каби йўналишларда малакали кадрлар тайёрлашни бошлаши кўзда тутилган.
Шавкат Мирзиёев ушбу режаларни маъқуллаб, Ўзбекистон таълим соҳасидаги лойиҳаларни амалга ошириш учун қулай шароитлар яратишга тайёрлигини билдирган.
Маълумот учун, Cintana компанияси Аризона давлат университети билан ҳамкорликда ташкил этилган бўлиб, дунёнинг 30 мамлакатида фаолият юритади ва университетларда таълим сифатини ошириш билан шуғулланади.
