«Ташаббусли бюджет»да 33 та лойиҳа қўшимча ғолиб деб топилди

«Ташаббусли бюджет»нинг 2025 йилги 1-мавсуми якунларига кўра ғолиб бўла олмаган 33 та лойиҳа учун қўшимча маблағ ажратилди, деб хабар бермоқда Иқтисодиёт ва молия вазирлиги матбуот хизмати.

Қайд этилишича, халқ депутатлари туман (шаҳар) кенгашлари томонидан ғолиб бўлмаган навбатдаги лойиҳаларни молиялаштириш учун маҳаллий бюджетнинг қўшимча маблағлари ҳисобидан 7,5 миллиард сўм ажратилиб, 33 та лойиҳа қўшимча равишда ғолиб деб топилди.

Амалдаги тартибга кўра, халқ депутатлари туман (шаҳар) кенгашларига маҳаллий бюджетнинг қўшимча маблағлари ҳисобидан қўшимча тарзда ғолиб лойиҳаларни эълон қилиш ваколати берилган.

Ғолиб лойиҳалар рўйхати билан қуйидаги ҳавола орқали танишиш мумкин.

“Ташаббусли бюджет” жараёнининг 2025 йилнинг 1-мавсуми учун овоз бериш якунларига кўра, 3,2 триллион сўмлик 2 369 та лойиҳа ғолиб деб топилганди.

Лойиҳаларнинг

• 964 тасини — ички йўлларни таъмирлаш билан боғлиқ тадбирлар (1396 млрд сўмлик);
• 699 тасини — мактабларни таъмирлаш ва моддий-техника базасини ривожлантириш тадбирлари (875 млрд сўмлик);
• 247 тасини — соғлиқни сақлаш муассасаларини таъмирлаш ва моддий-техника базасини ривожлантириш тадбирлари (329 млрд сўмлик);
• 60 тасини — боғчаларни таъмирлаш ва ва моддий-техника базасини ривожлантириш тадбирлари (72 млрд сўмлик);
• 44 тасини — кўча чироқларини ўрнатиш ёки таъмирлаш тадбирлари (52 млрд сўм);
• 34 тасини — ичимлик суви ва оқова тизимини яхшилаш билан боғлиқ тадбирлар (49 млрд сўм);
• 321 тасини — бошқа тадбирлар (415 млрд сўмлик) ташкил этди.