АҚШ визасини олмоқчи бўлганларнинг ижтимоий тармоқлари текширилади

АҚШнинг талабалар ва бошқа турдаги визаларини олмоқчи бўлганларнинг ижтимоий тармоқлари текширилади. Бу ҳақда New York Times хабар берди.

Давлат котиби Марко Рубио консуллик ходимларига АҚШ ва Исроилни танқид қилишда гумонланганларнинг ижтимоий тармоқларини синчковлик билан текширишни буюрган. Алоҳида назоратга олинадиган виза турлари F, М ва J (талабалар, касбий таълим ва меҳмонга бориш учун визалар) ҳисобланади.

Қуйидаги шахсларнинг ижтимоий тармоқлардаги постлари синчиклаб текширилади:  

• террорчилар билан алоқаси бор ёки уларга хайрихоҳлик билдиришда гумон қилинаётганлар;
• 2023 йил 7 октябрдан (ҲАМАС Исроилга ҳужум қилган ва Ғазодаги уруш бошланган сана) 2024 йил 31 августгача АҚШнинг талабалар ёки алмашинув дастури визасига эга бўлганлар;
• ёки визаси 2024 йил октябрь ойидан кейин бекор қилинганлар.

Шунингдек, агар ариза берувчининг хатти-ҳаракати ёки муносабати АҚШ фуқаролари ёки маданиятига нисбатан душманона муносабатда бўлса, унга виза берилиши рад этилиши мумкин.