Илк бор ATF 14&Under турнирлари бир вақтда тўрт шаҳарда ўтказилмоқда — миқёсли серия бутун Осиё эътиборини жалб қилмоқда

2025-йил май ойидан бошлаб Ўзбекистонда ATF 14&Under халқаро мусобақалар серияси ўтказилмоқда — мазкур турнирлар Осиё теннис федерацияси (ATF) ташаббуси ва Ўзбекистон теннис федерацияси (ЎТФ) кўмагида ташкил этилмоқда.

Мусобақалар Бухоро, Қарши, Самарқанд ва Тошкент шаҳарларида ўтказилмоқда. Серияда Япония, Жанубий Корея, Саудия Арабистони, АҚШ, Арманистон, Қозоғистон, Қирғизистон, Туркманистон ва Ўзбекистондан келган 185 нафардан зиёд теннисчи иштирок этди.

Сериянинг ўзига хос жиҳати — ҳар бир ўрин учун ўйин ўтказилади. Асосий сеткада мағлуб бўлган иштирокчилар мусобақани тарк этмайди, балки рейтинг очколари ва муҳим тажриба тўплашни давом эттиради. Бу ёш спортчиларнинг мотивацияси тушиб кетмаслиги ва ривожини таъминлашга хизмат қилади.

Самарқанд босқичи алоҳида ажралиб турди: ҳар куни кортларда 32 тадан ортиқ ўйин бўлиб ўтди. Томошабинлар ҳис-туйғуларга бой ва рақобатли беллашувларга гувоҳ бўлишди. Турнир ёшлар спорти учун ҳақиқий байрамга айланди ва юқори даражадаги ташкилотчиликни намоён этди.

Энг ёрқин иштирокчилардан — Муслимахон Турдимуродова (Samarkand ATF 14&Under мусобақасининг якка разряд ғолибаси), Хамза Эльмансури (Самарқанддаги якка разряд ғолиби) алоҳида қайд этилди.

7–12 июль кунлари Тошкентдаги Tashkent ATF 14&Under босқичи “Пахтакор” стадиони кортларида бўлиб ўтди. Турнир 8 давлат вакилларини қабул қилди ва мавсумнинг энг миқёсли босқичларидан бирига айланди. Бу ерда рейтинг учун, шахсий теннис йўли учун ва биринчи халқаро унвонлар учун кураш кетди.

«ATF 14&Under мусобақалари — бу тенниснинг минтақа бўйича келажагини барпо этадиган пойдевордир. Ўзбекистон Марказий Осиёда болалар теннисини ривожлантириш маркази сифатида ўз мақомини яна бир бор тасдиқламоқда. Турнирлар қандай даражада ўтаётгани билан фахрланамиз: барча ташкилотчилик ишлари яхши йўлга қўйилган, очиқлик бор ва ҳар бир иштирокчига алоҳида эътибор қаратилмоқда.

Энг муҳими — бу шунчаки мусобақа эмас. Бу — оммавий спортга, болаларнинг орзуларига ва бутун теннис экотизимини ривожлантиришга қўшилаётган улкан ҳиссадир. Федерация мураббийлар, инфратузилма, талабалар ва ветеранлар лойиҳаларига инвестиция киритмоқда. Биз учун энг асосий мақсад — Ўзбекистоннинг ҳар бир ҳудудида ўсиш ва ривожланиш учун имконият яратиш. Бугун ёш теннисчилар Самарқанд ва Тошкентда илк қадамларини қўймоқда, эртага эса мамлакат шарафини халқаро ареналарда ҳимоя қилади», — деди Ўзбекистон теннис федерацияси бош котиби Сардор Камилов.

Финал натижалари:

• Қизлар ўртасида якка разряд ғолибаси — Муслимахон Турдимуродова, у финалда Мумтозбегим Акрамовани 6-2, 6-3 ҳисобида мағлуб этди.
• Жуфтлик разрядида — Муслимахон Турдимуродова ва Камилла Қаюмова жуфтлиги ғалаба қозонди: 6-2, 6-2.
• Ўғил болалар ўртасида якка разряд ғолиби — Хамза Эльмансури (Саудия Арабистони), у Исмоилжон Турсуновни 2-6, 6-2, 6-4 ҳисобида енгди.
• Жуфтлик разрядида — Саидаслам Фарходов ва Хамза Эльмансури жуфтлиги 6-0, 7-6 ҳисобида ғалаба қозонди.

Ўзбекистон яна бир бор исботламоқда: теннис — бу шунчаки спорт эмас, балки интизом, йўл ва илҳомдир.