Наманганда ITF J30 Namangan турнири бўлиб ўтди: 12 давлатдан келган ёш юлдузлар унвон учун курашди

2025 йил 21–27 июль кунлари Наманганда ITF World Tennis Tour Juniors серияси доирасидаги халқаро ёшлар турнири — J30 Namangan муваффақиятли ўтказилди. Турнир Ўзбекистон теннис федерацияси томонидан ташкил этилди ва минтақа учун теннисни ривожлантиришда муҳим воқеага айланди.

Мусобақада Ўзбекистон, Россия, Франция, Германия, Ҳиндистон, Жанубий Корея, Қозоғистон, Исроил, Тожикистон, Туркманистон, АҚШ ва Испания каби 12 давлатдан 100 нафардан ортиқ ўғил ва қиз теннисчилар иштирок этди.

Фото: Ўзбекистон теннис федерацияси матбуот хизмати

Фото: Ўзбекистон теннис федерацияси матбуот хизмати

Наманган кортларида 18 ёшгача бўлган йигитлар ва қизлар ўртасида якка ва жуфтлик йўналишларида 120 дан ортиқ учрашув ўтказилди. Ёш теннисчилар юқори савияда тайёргарлик ва ғалаба учун ирода намоён этишди.

Турнир ғолиблари ва финал натижалари

Йигитлар. Якка разряд (Boys Singles)
Махмудбек Бекназаров (Ўзбекистон) Вигго Вагенкнехтни (Германия) 6-3, 6-4 ҳисобида мағлуб этди

Қизлар. Якка разряд (Girls Singles)
Татьяна Головина (Россия) Юлия Мякоткина (Россия) устидан 6-2, 7-5 ҳисобида ғалаба қозонди

Йигитлар. Жуфтлик разряди (Boys Doubles)
Махмудбек Бекназаров/Абдураҳмон Каримов (Ўзбекистон) — Тимур Даутов ва Амир Сафоев (Ўзбекистон) устидан 6-2, 6-3 ҳисобида ғалаба қозонди

Қизлар. Жуфтлик разряди (Girls Doubles)
Шаҳзода Артиқбоева (Ўзбекистон)/Линара Булешева (Қозоғистон) — Александра Качушкина ва Кира Ертман (Қозоғистон) жуфтлигини 6-3, 6-2 ҳисобида мағлуб этишди

«J30 турнири Наманганда шунчаки мусобақа эмас, балки Ўзбекистон халқаро теннис тизимида ўз позициясини мустаҳкамлаётганининг ёрқин исботидир. Қувонарлиси, теннисга қизиқиш нафақат спортчилар, балки томошабинлар орасида ҳам ортиб бормоқда. Федерация мамлакатнинг барча ҳудудларида — вилоятлардан то пойтахтгача — ёш истеъдодлар учун шароит яратишни давом эттиради. Бу уларнинг профессионал спорт ва халқаро тан олиниш йўлига очиладиган эшигидир», — деди Ўзбекистон теннис федерацияси бош котиби Сардор Камилов.

Фото: Ўзбекистон теннис федерацияси матбуот хизмати

Фото: Ўзбекистон теннис федерацияси матбуот хизмати

Турнир аҳамияти

J30 Namangan — ITF жаҳон ёшлар сериясининг бир қисми бўлиб, 18 ёшгача бўлган спортчиларга рейтинг очколари тўплаш ва халқаро тажриба орттириш имконини беради. Бундай мусобақаларда иштирок этиш «Катта шлем» турнирлари ва профессионал теннисга илк қадамдир.

Фото: Ўзбекистон теннис федерацияси матбуот хизмати

Мусобақанинг Наманганда ўтказилиши Ўзбекистоннинг халқаро теннис тадбирлари учун муҳим майдон сифатидаги аҳамияти ортиб бораётганини яна бир бор тасдиқлайди. Турнир Ўзбекистон теннис федерацияси кўмагида ташкил этилди. Федерация инфратузилмани ривожлантириш ва ёш теннисчилар учун имконият яратишга фаол инвестиция киритмоқда.