Ҳиндистон корхоналари АҚШ босими туфайли Россиядан нефт сотиб олишни тўхтатди

Ҳиндистоннинг давлат нефтни қайта ишлаш заводлари Вашингтон босимининг кучайиши ва қатъий божлар жорий этиш таҳдидлари туфайли Россия нефтини сотиб олишдан бош тортмоқда, деб ёзди Bloomberg компанияларнинг харид режалари билан бевосита таниш бўлган шахсларга таяниб.

Материалда айтилишича, Indian Oil Corp., Bharat Petroleum Corp. ва Hindustan Petroleum Corp. каби компаниялар ҳукуматдан аниқ кўрсатма олмагунча, яқин даврда нефтни спот харид қилишдан вақтинча воз кечишни режалаштирмоқда.

Нашр манбалари бу қарор октябр ойида Россиянинг Urals экспорт нефт маркасини сотиб олишга таъсир этишини ҳам маълум қилди.

Аввалроқ, АҚШ президенти Доналд Трамп Россия нефтини сотиб олгани учун жазо сифатида Ҳиндистон товарларига қўшимча 25 фоизлик бож жорий қилган эди. Оқ уй раҳбари Ню-Деҳлини Россия уруш машинасини молиялаштиришда айблади.

Қайд этилишича, бу кескинлик ушбу ҳафтадаги фючерсларга таъсир кўрсатган, чунки трейдерлар етказиб беришда узилишлар бўлиши эҳтимолини, шунингдек, агар Ҳиндистон нефтни қайта ишлаш заводлари камроқ нефт сотиб олишни бошласа, Москванинг муқобил харидорларни топиши мумкинлигини истисно қилмаяпти. 7 август ҳолатига кўра, Brent нефти нархи деярли ўзгармади ва бир баррел учун тахминан 67 долларни ташкил этди.

Нашрнинг ёзишича, расмий Ню-Деҳли нефтни қайта ишлаш заводларига Россия нефтини сотиб олишни тўхтатиш бўйича ҳеч қандай кўрсатма бермаган. Бундан ташқари, Ҳиндистон бош вазири Нарендра Моди ҳукумати Трампнинг божларига қарши чиқди.

Маълумотларга кўра, энг қизғин даврда Ҳиндистон кунига 2 миллион баррелдан ортиқ Россия нефтини импорт қилган, Россиянинг Украинага кенг кўламли бостириб киришидан олдин эса импорт деярли нолга тенг эди.