Оқ уй Трамп ва Путин музокараларининг бошланиш вақтини эълон қилди

АҚШ президенти Доналд Трамп ва Россия президенти Владимир Путиннинг Аляска штатидаги Анкориж шаҳрида бўлиб ўтадиган учрашуви 15 август куни соат 11:00 да (Тошкент вақти билан 16 август, соат 0:00) бошланади.

Президент жадвалига кўра, Трамп АҚШ пойтахтини Вашингтон вақти билан соат 6:45 да тарк этади. Музокаралардан сўнг, Трамп Аляскадан маҳаллий вақт билан соат 17:45 да жўнаб кетишни режалаштирмоқда.

Музокаралар якунида президентлар қўшма матбуот анжумани ўтказади. Унинг бошланиш вақти ҳозирча номаълум.

Трамп ва Путин саммитининг марказий мавзуси Украина инқирозини ҳал қилиш бўлади, аммо бошқа мавзулар ҳам муҳокама қилинади. Икки давлат президентлари иқтисодий соҳадаги икки томонлама ҳамкорлик ва глобал хавфсизлик масалаларини муҳокама қилади, деди Россия президенти ёрдамчиси Юрий Ушаков. Унинг аниқлик киритишича, етакчилар музокараларининг давомийлиги мунозара қандай кечишига боғлиқ бўлади.

Учрашув АҚШ Ҳарбий-ҳаво кучлари ва қуруқликдаги қўшинларининг қўшма объекти – Элмендорф-Ричардсон базасида бўлиб ўтади. У Аляскадаги энг йирик шаҳар ва 100 мингдан ортиқ аҳоли истиқомат қиладиган Анкорижда жойлашган.