Трамп Украинадаги урушни тугатса, жаннатга тушиши мумкинлигини айтди

АҚШ президенти Доналд Трамп Fox News телеканалига берган интервьюсида ўлимидан сўнг жаннатга киришни истаётганини ва бунга Украинадаги урушни тугатиш борасидаги саъй-ҳаракатлари ёрдам беришига умид қилишини айтди.

«Мен бу урушнинг тугашини истайман. У ерда америкалик аскарлар ҳалок бўлмаяпти, асосан руслар ва украинлар жабр кўрмоқда. Агар мен ҳар ҳафта 7 минг кишининг ҳалок бўлмаслигига эришсам, ажойиб бўлади», деди у.

Трамп сўзларига кўра, у жаннатга киришга умид қилмоқда, гарчи «бу жойга лойиқ бўлишни унчалик яхши уддалай олмаяпти».

«Аммо барибир жаннатга киришга эришсам, айнан шу [Украинадаги урушни тугатиш] бунинг сабабларидан бири бўлади», деб қўшимча қилди Трамп.

Шунингдек, у аввалроқ Ҳиндистон ва Покистон ўртасидаги зиддиятнинг авж олишини тўхтатишга муваффақ бўлганини эслатди.

«Ўйлайманки, мен ўша вазиятда кўплаб одамларнинг ҳаётини сақлаб қолдим. Улар аллақачон урушга тайёргарлик кўрган, самолётларни уриб туширган ва агар воқеалар ривожига йўл қўйсам, бу ядровий можарога айланиши мумкин эди. Мен ҳар икки томон билан музокара олиб бордим ва жанговар ҳаракатлар давом этар экан, улар билан савдо шартномаларини имзоламаслигимни айтдим. Мен уларга қўнғироқ қилдим ва тинчликка эришилди», деб таъкидлади Америка президенти.