Трамп тез орада Путин билан гаплашиш ниятида

АҚШ президенти Доналд Трамп Россия қўшни давлатга 2022 йилнинг февралида кенг кўламли бостириб кириши бошланганидан буён энг йирик дрон ва ракета ҳужумини уюштирганидан кейин Украинадаги урушдаги вазиятдан норозилигини билдирди. «У ерда бўлаётган воқеалар мени хурсанд қилмаяпти», деди Оқ уй раҳбари 7 сентябр, якшанба куни Эндрюс авиабазасида журналистларга. «Мен буни ҳал қилишимизга ишонаман. Лекин мен улардан мамнун эмасман. Мен бу уруш билан боғлиқ бўлган ҳамма нарсадан мамнун эмасман».

Трамп, шунингдек, яқин орада Россия президенти Владимир Путин билан телефон орқали мулоқот қилиш ниятида эканлигини айтди. «Жуда тез орада. Келгуси бир неча кун ичида», — дея унинг сўзларини келтиради CNN. Трамп Путин билан яқин орада суҳбатлашиш режалари ҳақида икки кун аввал, 5 сентябр куни маълум қилганди: «Ҳа, мен гаплашаман. Биз жуда яхши мулоқот қилдик», деди у Оқ уйда бўлиб ўтган брифингда.