Жорий йилнинг 16 июн куни Самарқанд вилоятида фуқаро ҳуқуқни муҳофаза қилувчи органларга ариза билан мурожаат қилади.

Хабарга кўра, у тикувчилик корхонасини ташкил қилиш учун бўш ер майдони излаб юрган вақтида, Тойлоқ туманида яшовчи П.Ф. исмли шахс унинг ишончига кириб, туманнинг Маданият маҳалласи ҳудудида жойлашган ҳокимият захирасида бўлган 0,18 гектар ер майдонини 75 минг АҚШ долларига сотишини айтади.

Ҳуқуқбузар кейинчалик туман Кадастр бўлимида ишловчи танишлари орқали ҳужжат расмийлаштириб беришини ваъда қилган. Аризада ҳуқуқбузар олдиндан 15 минг АҚШ доллари миқдоридаги пулларни талаб қилиб келаётганлиги маълум қилиниб, унга нисбатан қонуний чора кўриш сўралган.

Самарқанд вилоят ИИБ Тезкор-қидирув хизмати, ДХХ вилоят бошқармаси ҳамда Департаментнинг вилоят бошқармаси ходимлари ҳамкорлигида, тезкор тадбир ўтказилиб, П.Ф. ариза муаллифидан 15 минг АҚШ доллари миқдоридаги пулларни олган вақтида ушланган.

Ҳолат юзасидан терговга қадар текширув ҳаракатлари ўтказилмоқда.