АҚШнинг молиявий ва иқтисодий мавзуларда фаолият юритувчи «Forbes» журнали дунёнинг энг машҳур янги миллиардерлари рўйхатини эълон қилди. Бу ҳақда журнал веб-сайтида хабар берилди.

Журналнинг қайд этишича, янги миллиардерлар рўйхатидаги энг бой одам «Las-Vegas Sands» казино ва курортлар тармоғи асосчисининг беваси Мириам Адельсон бўлган. Унинг компаниядаги мерос улуши 27,1 миллиард долларлик бойлигининг катта қисмини ташкил қилади.

Таъкидланишича, 2021 йилги янги миллиардерлар рўйхати нафақат бизнесменлар, балки бошқа соҳа вакилларини ҳам ўз ичига олган. Хусусан, ундан қўшиқчи ва «Fenty Beauty» брендининг асосчиси Риҳанна ҳам ўрин олган. У компаниянинг 50 фоизига эга бўлиб, бойлиги 1,7 миллиард долларни ташкил этади. Шунингдек, у барбадослик биринчи миллиардерга айланган. «Forbes» рўйхатига, шунингдек, «Microsoft» компанияси асосчисининг собиқ рафиқаси Мелисса Гейтс ҳам 1,6 миллиард доллар бойлик билан киритилган.

Қайд этилишича, янги миллиардерларнинг энг кўпини Хитой фуқаролари ташкил этган. Уларнинг сони 160 кишини ташкил этган. 100 нафар янги миллиардер АҚШдан, Германия ва Ҳиндистондан эса ҳар биридан 20 нафар киши миллиардерлар қаторидан жой олган. Ҳаммаси бўлиб рўйхатдан 400 киши жой олган, уларнинг умумий бойлиги 1 триллион доллардан ошган.

«Ethereum» блокчейн платформаси ва худди шу номдаги капиталлашув бўйича иккинчи йирик криптовалюта асосчиси Виталик Бутерин «Forbes» талқини бўйича энг кўзга кўринган янги миллиардерлар рўйхатига киритилди.

«Forbes» маълумотларига кўра, Бутериннинг бойлиги тахминан 1,3 миллиард долларни ташкил қилади. Ҳозирги вақтда «Ethereum» капиталлашуви, «Coinmarketcap» маълумотларига кўра, 490 миллиард долларни ташкил этади.

Аввалроқ «Ethereum» платформаси ва рақамли валюта асосчиларидан бири, россиялик 27 ёшли Виталик Бутерин дунёдаги энг ёш криптовалюта миллиардери бўлганди. Шунингдек, «Forbes» дунёнинг энг ёш миллиардерини маълум қилганди.