АҚШнинг Мейн штатидаги Люистон шаҳрида қуролли шахс одамларни ўққа тутган. Олинган маълумотларга кўра, камида 22 киши ҳалок бўлган, 50 дан ортиқ киши эса жароҳатланган.

АҚШ полициясига кўра, қуролланган одам ҳалигача зарарсизлантирилмаган. Полиция шунингдек, жиноятчи қуролли ва ўта хавфли экани ҳақида аҳолини огоҳлантирган.

Айтилишича, гумонланувчи 40 ёшли Роберт Кард исмли киши бўлган.

Жиноятчи топилгунича штатнинг иккинчи йирик шаҳри аҳолисига хавфсиз жойларда бошпана топиш тавсия этилган ва бутун шаҳарда карантин жорий қилинган.

«Люистонда кучли отишма рўй берди. Биз аҳолидан ўз уйларида қолишларини сўраймиз. Илтимос, уйларингизда қолинг ва эшикларингизни қулфланг» дея ёзган Мейн штати полицияси ўзининг X ижтимоий тармоғи (собиқ Twitter)даги саҳифасида.

Шунингдек, полиция жиноятчининг шахсини аниқлаш учун ёрдам сўраган. Мамлакат президенти Жо Байден эса воқеадан бохабар қилинган.

Эслатиб ўтамиз, аввалроқ Туркияда содир бўлган қуролли тўқнашувда Ўзбекистон фуқароси отиб ўлдирилганлиги ҳақда хабар берилганди.