Президент Шавкат Мирзиёев бир неча кунлик амалий ташриф билан АҚШга боргани ҳақида хабар берилганди. Давлат раҳбарини Ню-Йорк шаҳридаги ўзбек диаспораси вакиллари ўзгача тарзда кутиб олди.

Қайд этилишича, асосан ёшлардан иборат гуруҳ Президент кортежи ўтадиган йўл атрофида байроқлар ва «Ўзбекистон!» ҳайқириқлари билан мамлакат делегациясини қарши олган.

Тасвирлардан кўриш мумкинки, Шавкат Мирзиёевнинг океан ортига ташрифи айни пайтда ўқиш, иш ёки бошқа муносабат билан АҚШда бўлиб турган ўзбекистонликлар учун муҳим воқеликка айланган. Буни уларнинг Ўзбекистон президентининг ташрифига алоҳида тайёргарлик кўрганидан ҳам пайқаш мумкин.

Хусусан, Ўзбекистон байроқлари рангларида кийинган йигитлар, бошларига миллий дўппиларни кийган қизлар ва «АҚШдаги ўзбек ватандошлари ҳар доим Ўзбекистон билан бирга» ёзуви туширилган баннерларни кўтариб олган ёшлар Шавкат Мирзиёевнинг АҚШга қилган сафари катта қизиқиш уйғотганига ёрқин мисол бўла олади.

Эслатиб ўтамиз, кеча, 19 сентябр куни Президент АҚШга ташрифи доирасида Қўшма Штатларда яшаётган ва ишлаётган бир гуруҳ ўзбекистонликлар ҳамда ушбу мамлакатнинг етакчи олий таълим даргоҳларида таҳсил олаётган «Эл-юрт умиди» жамғармаси стипендиантлари билан учрашди. Унда давлат раҳбари чет элда ўқиган ва йирик компанияларда ишлаб, тажриба орттирган ёшларни Ўзбекистонга қайтариш учун шароитлар яратиш зарурлигини айтди. Шунингдек, Шавкат Мирзиёев Қўшма Штатларда ўқиётган ва турли компанияларда ишлаётган ёшларнинг фикр ва таклифларини ҳам тинглади.