Пахтаобод туманида Ucell компаниясининг катта миқдордаги пулини онлайн биржада ютқазиб қўйган ходимга нисбатан қўзғатилган жиноят иши судда кўриб чиқилиб, ҳукм ўқилди. Bugun.uz мазкур ҳолат юзасидан ўтказилган суд иши ҳужжатлари билан танишиб чиқди.

Маълумотларга кўра, 1999 йилда туғилган А.И. Ucell компаниясининг Пахтаобод тумани филиалида катта сотувчи вазифасида ишлаган. Йигит 2023 йилнинг октябрь ойида компания томонидан мижозларга тўловлар учун ўтказилган 198 млн 900 минг сўм пулни Paynet иловасидан фойдаланиб, ўзининг номидаги банк пластик картасига ўтказиб олган. Сўнгра ушбу маблағни Bitcoin олди-сотдиси учун Binance криптовалюта биржасига тикиб юборган.

А.И. 2023 йил ноябрь ойида шу усулда компаниянинг 249 млн 907 минг сўм маблағини ўз банк картасига ўтказиб, яна онлайн биржага тиккан. Аммо унинг омади келмаган ва компаниянинг жами 448 млн сўмдан ортиқ пулини ютқазиб қўйган.

Судда А.И. айбига иқрор бўлиб, етказилган зарарни қоплаганини, қилган ишидан пушаймонлигини айтган ва ўзига нисбатан қонуний енгиллик беришни сўраган.

Суд қарори билан А.И. Жиноят кодексининг 167-моддаси 3-қисми «а» бандида кўрсатилган жиноятни (жуда кўп миқдорда ўзлаштириш ёки растрата йўли билан талон-торож қилиш) содир қилганликда айбли деб топилган. Унга нисбатан 1 йил давлат ҳамда давлат улуши иштирокидаги корхоналарда мансабдорлик ва моддий жавобгарлик юклатилган вазифаларда ишлаш ҳуқуқидан маҳрум қилиб, ҳар ойлик иш ҳақининг 20 фоизини давлат даромади ҳисобига ушлаб қолган ҳолда 2 йил ахлоқ тузатиш ишлари жазоси тайинланган.