Андижонда уч туп чинор дарахтини кесганларга нисбатан икки йилга озодликни чеклаш жазоси тайинланди. Бу ҳақда Экология вазирлиги матбуот хизмати хабар берди.

Маълум бўлишича, 2023 йил 4 апрелда Андижон вилояти, Избоскан туманида яшовчи икки нафар фуқаро уч туп ғарб чинори дарахтларини яшаш хонадони учун хавф туғдираётгани ва қурилиш, таъмирлаш ишларига халал бераётгани сабаб кесиб ташлаган.

Бу орқали ўсимлик дунёсига 131 миллион 400 минг сўмлик кўп миқдорда зарар етказишган.

Ҳолат Экология вазирлиги ходимлари томонидан ўрганилиб, тегишли ҳужжатлар прокуратурага юборилган. Прокуратура томонидан эса А.А. ва М.И.га нисбатан жиноят иши қўзғатилган. 18 сентябр куни дарахт кесганларга суд ҳукми ўқилган.

Ҳукмга кўра, уларнинг ҳар бирига келтирилган зарарни қоплаш билан бирга, 2 йил муддатга озодликни чеклаш жазоси тайинланган.