17:53 | 28.10.23

                       

Қашқадарёда экинларини ичимлик суви билан суғориб келган фуқарога озодликдан чеклаш жазоси тайинланди

Шунингдек, судланувчидан МЧЖ фойдасига 60 млн сўмдан ортиқ зарар ундириладиган бўлди.

Қашқадарёда ичимлик сувидан ноқонуний фойдаланиб келган шаҳрисабзлик фермерга суд ҳукми ўқилди. Бу ҳақда «Қашқадарё сув таъминоти» МЧЖ ахборот хизмати хабар берди.

Фото: «Қашқадарё сув таъминоти» МЧЖ ахборот хизмати

2023 йил 6 октябр куни Жиноят ишлари бўйича Шаҳрисабз туман судида шу туманнинг Уймовут қишлоғида яшовчи фуқаро Ё.А.га нисбатан қўзғатилган жиноят иши кўриб чиқилган.

Маълум бўлишича, судланувчи «Ашуров Ёрқин Истамович» фермер хўжалиги раҳбари бўлиб, «Шаҳрисабз-Қарши» магистрал қувурига д-76 мм.лик қувур орқали ноқонуний уланиб, ичимлик сувидан экинларни суғориб келган.

Фото: «Қашқадарё сув таъминоти» МЧЖ ахборот хизмати

Мазкур қонунбузилиш ҳолати «Қашқадарё сув таъминоти» МЧЖ ва Ичимлик сувидан фойдаланишни назорат қилиш вилоят ҳудудий инспекцияси ходимлари томонидан ўтказилган рейд тадбирлари давомида аниқланган.

Суд тўпланган ҳужжатлар ва томонларнинг кўрсатмаларини ўрганиб, Ё.А.га бир йил муддатга озодликдан чеклаш жазосини тайинлаган.

Шунингдек, ундан «Қашқадарё сув таъминоти» МЧЖ фойдасига 60 693 732 сўм зарар ундириладиган бўлди.

Мавзуга доир хабарлар билан танишинг: