Қашқадарёда газли сув аппарати портлаб кетди
Ҳодиса оқибатида бир нафар фуқаро вафот этган
2023 йилнинг 15 июн куни Қашқадарё вилояти Китоб туманида тахминан соат 12:00 ларда Китоб деҳқон бозори олдида кичик портлаш содир бўлди.
Унда, туманнинг «Гулистон» МФЙсида яшовчи фуқаро T.Й. га тегишли бўлган, қўлбола усулда ясалган газли сув тайёрловчи аппарат портлаб кетган. Аниқланишича, сув сақлаш идишига кислородли баллондан кўп босим берилиши оқибатида, ёрилиб портлаш содир бўлган.
Натижада Китоб тумани ва Шаҳрисабз шаҳрида яшовчи 2 нафар фуқаро тан жароҳати олиб шифохонага ётқизилган. Бироқ, шифокорлар томонидан кўрсатилган тиббий муолажаларга қарамасдан фуқаро Д.A. вафот этган.
Ҳолат юзасидан Китоб туман ИИБ ҳузуридаги Тергов гуруҳи томонидан Ўзбекистон Республикаси Жиноят кодексининг 259-моддаси 2-қисми «а» банди асосида жиноят иши қўзғатилиб, дастлабки тергов ҳаракатлари олиб борилмоқда.
