Қашқадарё вилояти Қарши шаҳрида ҳокимлик ходими 2 миллион 200 минг сўм пора билан қўлга олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Аниқланишича, ҳокимлик ходими фуқарога уй-жой сотиб олиш учун субсидия ажратиб беришни ваъда қилган.

«Бош прокуратура ҳузуридаги департаментнинг Қашқадарё вилоят бошқармаси ва ИИБ ходимлари Қарши шаҳар ҳокимлиги шўба бош мутахассиси фуқароларга уй-жой сотиб олиш учун субсидия ажратиш масаласини ҳал қилиб бериш эвазига 2,2 млн сўмни олган вақтида ашёвий далиллар билан қўлга олинган», — дейилади хабарда.

Ҳолат юзасидан Жиноят кодексининг 168-моддаси (фирибгарлик) ва 212-моддаси (пора олиш-беришда воситачилик қилиш) билан жиноят иши қўзғатилиб, тергов ҳаракатлари ўтказилмоқда.