Қарши шаҳрида Шавкат Мирзиёев раислигида Қашқадарё вилоятини ижтимоий-иқтисодий ривожлантириш масалалари юзасидан бўлиб ўтаётган йиғилишда Президент бир неча таклифларни илгари сурди. Бу ҳақда Президент матбуот котиби Шерзод Асадов хабар берди.

Йиғилишда, биринчи январдан бошлаб Шаҳрисабз аэропортига янги АТР самолёти парвозлари йўлга қўйилиб, Самарқанд, Бухоро, Хоразм ва водий вилоятларига маҳаллий рейслар сони кўпаяди.

Айтилишича, Тошкент-Қарши йўналишида авиарейслар ҳафтасига икки мартадан етти мартага оширилади. Бунинг натижасида авиачипталар нархи икки баробар арзонлашиб, хорижий ва маҳаллий сайёҳлар оқими уч баробарга кўпайиши кутилмоқда.

Шунингдек, 2024 йилда Тахтақорача довонида ўтиш талабларини енгиллаштириш учун янги туннел ва йўл қуриш лойиҳаси бошланади. Хитойлик инвесторлар билан ҳамкорликда Самарқанд ва Шаҳрисабзни боғловчи 30 километрлик йўлни таъмирлаш ишлари бошланади.

Шу билан бирга, «Ғузор-Бухоро-Нукус-Бейнеу» йўлининг Қашқадарёдан ўтадиган 100 километр қисмини таъмирлашга 122,5 миллион доллар жалб қилинади.

Шунингдек, 2024 йилда хорижий сайёҳлар сонини 500 мингтага етказиш вазифаси қўйилган.