Шавкат Мирзиёев кеча, 1 октябр куни Қатарга ташрифи давомида Al Mirqab Capital холдинг компанияси ижрочи директори Саиф ур-Раҳмон Хонни қабул қилди. Бу ҳақда давлат раҳбарининг матбуот хизмати хабар берди.

Қайд этилишича, учрашувда меҳмонхона инфратузилмаси ва туризм хизматларини ривожлантириш, логистика ва энергетика тармоғини модернизация қилиш борасидаги ҳамкорлик истиқболлари муҳокама қилинган.

Хусусан, компания томонидан Тошкент вилоятида логистика маркази, Бухоро шаҳрида меҳмонхона-конгресс мажмуасини қуриш, мамлакатда электр ишлаб чиқариш қувватларини кенгайтиришга инвестиция киритиш режалари кўриб чиқилган.

Инвестиция лойиҳалари қўшма «йўл харитаси» асосида амалга оширилиши маълум қилинди.

Маълумот учун, Al Mirqab Capital компаниясига 1983 йилда асос солинган бўлиб, у АҚШ, Европа ва Яқин Шарқда For Seasons, The Ritz Carlton ва бошқа брендлардаги 20 та йирик меҳмонхонага эгалик қилади. Компания активлари қиймати 8 миллиард доллардан зиёдни ташкил этади.

Эслатиб ўтамиз, аввалроқ Қорақалпоғистонда Марказий Осиёдаги энг йирик шамол электр станцияси қурилиши ҳақида хабар берилганди.