Икки Ўзбекистон фуқароси 2023 йилнинг 4 октябр куни Австрия ҳудудида авиаҳалокатга учради. Бу ҳақда SiolNET нашри хабар берди.

Қайд этилишича, 4 октябр куни кечқурун Австриянинг Каринтияс федерал ерида Словенияга тегишли кичик самолёт ҳалокатга учраган. Унинг ичида икки нафар 21 ёшли Ўзбекистон фуқароси К.Н. ва А.Х.лар бўлган. Улар бахтсиз ҳодисадан омон қолган бўлса-да, оғир аҳволда шифохонага ётқизилган.

Маълумотларга кўра, ҳодиса Клагенфурт яқинидаги Диез муниципалитетида содир бўлган. Ҳалокат сабаблари ҳозирча маълум эмаслиги, ҳолат юзасидан Австрия ваколатли органлари томонидан тергов ўтказилаётгани маълум қилинган.

Самолёт минг метр баландликдаги ўтиш қийин бўлган мураккаб рельефли ҳудудга қулагани сабабли экипаж аъзоларини қутқариш қийин кечган. Қутқарув ишларида 70 нафар ўт ўчирувчи ҳамда полициячилар иштирок этган. Шунингдек, иккита вертолёт ҳам жалб қилинган.

Sierra5 авиация портали маълумотларига кўра, самолёт Словениянинг Aviation Career Center авиация мактабига тегишли бўлиб, асосан мактаб парвозлари учун фойдаланилган.

Икки соат давом этган қутқарув операциясидан сўнг 20:00 ларга бориб полиция вертолёти ёрдамида воқеа жойи топилган ҳамда оғир аҳволдаги экипаж аъзоларидан бири Австриянинг Виллач шаҳридаги, иккинчиси эса Германиянинг Кёлн шаҳридаги шифохонага олиб борилган.

«Дунё» ахборот агентлигининг хабар қилишича, Ўзбекистон элчихонаси дипломатлари жабрланувчилар билан боғланган. Ҳозирда уларга зарур ёрдам кўрсатилаётгани, элчихона Каринтия ҳуқуқ-тартибот идоралари вакиллари, тиббиёт муассасалари маъмурияти ва бошқа тегишли ташкилотлар билан алоқа ўрнатиб, вазиятни назоратга олгани маълум қилинган.