Тошкент шаҳар ҳокими вазифасини вақтинча бажарувчи Бахтиёр Раҳмонов пойтахтнинг собиқ ҳокими Жаҳонгир Ортиқхўжаевнинг Яшнобод тумани ҳокимига нисбатан интизомий жазо қўллаш ҳақидаги қарорини бекор қилди.

Тошкент шаҳри собиқ ҳокимининг Яшнобод тумани ҳокими Бахтиёр Раҳманкуловга нисбатан қўлланилган ҳайфсан интизомий жазоси
чорасига оид фармойиши 2022 йил 4 ноябрда имзоланган.

Бахтиёр Раҳмонов ўз навбатида 28 февраль куни Меҳнат кодексининг 183-моддасига асосан ушбу интизомий жазони бекор қилган.

Мазкур моддага кўра, интизомий жазонинг амал қилиш муддати у қўлланилган кундан бошлаб бир йилдан ошмаслиги керак. Агар ушбу муддат давомида ходим яна жазога тортилмаса, у интизомий жазога тортилмаган деб ҳисобланади.

Интизомий жазо қўллаган иш берувчи уни йил тугагунга қадар ўз ташаббуси билан, ходимнинг илтимосига биноан, меҳнат жамоаси ёки ходимнинг бевосита раҳбарининг илтимосига биноан олиб ташлашга ҳақли.