Бухорода ҳайдовчи «Spark»га 25 нафар болани миндириб ҳаракатланди — видео
Аёл хусусий боғчада тарбиячи бўлиб ишлаши маълум бўлган.
Бухоро вилояти Ғиждувон туманида ҳайдовчи аёл «Spark» автомобилига 25 нафар болани миндириб ҳаракатлангани аниқланди. Бу ҳақда вилоят Ички ишлар бошқармаси Жамоат хавфсизлиги департаменти Йўл ҳаракати хавфсизлиги хизмати хабар берди.
Қайд этилишича, йўлларда хавфсизликни таъминлаш ва содир бўлиши мумкин бўлган ЙТҲларнинг олдини олиш мақсадида ўтказилган ўрганишлар давомида Ғиждувон туманидаги магистрал йўлда ҳайдовчи аёл «Spark» автомобилига 25 нафар болани миндириб ҳаракатлангани аниқланган.
Суҳбат давомида хусусий боғчада тарбиячи бўлиб ишловчи бу аёл ҳар куни боғча тарбияланувчиларини уйларига шу тарзда етказиб қўйиши маълум бўлган. У буни уйи яқин ҳудудда жойлашгани билан изоҳлашга уринган. Аёлнинг бу ҳаракати унинг маҳалласида кенг жамоатчилик иштирокида муҳокама қилинган.
