Чодакда канатга чиқиб дор йўлининг ярмида тўхтаб қолган фуқаро қутқариб олинди

Наманган вилояти Поп туманида жойлашган Чодак дам олиш масканида 30 июн куни канатга чиққан одам дор йўлининг ярмига бориб тўхтаб қолгани акс этган видеолар тарқалди.

Вилоят Фавқулодда вазиятлар бошқармаси интернетда тарқалган видеоларнинг бирида дор йўлида осилиб турган одам осма канат ишчиси экани, у канатни мойлаётганда дам олиш масканига келганлар бу ҳолатни видеога олгани, дор йўли ҳар куни мойланишини маълум қилди. Қайд этилишича, канат қўлбола услубда қурилган.

Шунингдек, тармоқларда тарқалган иккинчи видеодаги ҳолатда уч нафар аёл канат ходимлари томонидан берилган йўриқномага зид равишда дор йўлига чиқиб, ўзбошимчалик билан ҳар хил ҳаракатлар қилгани оқибатида йўлнинг ўртасида қолиб кетган. Икки ҳолат бир кунда эмас, балки аввалроқ юз берган, ҳеч ким тан жароҳати олмаган.

Ҳозирда ишчи гуруҳ томонидан белгиланган тартибда ҳужжатлар расмийлаштирилиб, ҳуқуқни мухофаза қилувчи идораларга топширилди, — дейилади Наманган вилоят ФВБ ахборот хизматининг хабарида.

Аввалроқ ФВВ Навоийда Cobalt Тўдакўл сув омборига оқиб кетгани бўйича тарқалган видео юзасидан ҳам ахборот берганди.