Коррупцияга қарши курашиш агентлиги 2024 йилнинг август-сентябрь ойларида ҳокимликлар, ташкилотлар ва корхоналар томонидан амалга оширилган 11 та давлат харидларида қонунбузарлик ҳолатлари аниқланганини маълум қилди. Қайд этилишича, жами 3,1 млрд сўмлик давлат харидлари қонунга хилоф тарзда ўтказилган.

Қонунбузарликлар қуйидаги давлат харидларида содир этилган:

• Нарпай туман Тиббиёт бирлашмаси – 673 млн сўм;
• Шуманай тумани йўллардан фойдаланиш давлат муассасаси – 343 млн сўм;
• Каттақўрғон туман мактабгача ва мактаб таълими бўлими – 215 млн сўм;
• Олтинсой тумани ҳокимлиги – 193 млн сўм;
• Қумқўрғон тумани 2-сон касб-ҳунар мактаби – 115 млн сўм;
• Бухоро давлат педагогика институти ҳузуридаги Академик лицей – 56 млн сўм;
• «Қамчиқавтойўл» корхонасининг 1,5 млрд сўмлик харидида аффилланган шахслар иштирок этган.

Агентликнинг тақдимномаларига асосан ғолибни аниқлаш ҳақидаги қарорлар бекор қилиниб, барча ҳужжатлар қонуний чора кўриш учун ҳуқуқни муҳофаза қилувчи органларга юборилган.