Тошкентда 13 сентябр куни «Dunyo bo’ylab» телеканалининг 31 ёшли бошловчиси Рамина Ягафарова вафот этди. Бу ҳақда Газета.uz нашри хабар берди.

Маълум бўлишича, Рамина Ягафарова 12 сентябр куни кечқурун Чилонзор туманидаги хусусий клиникада даволанаётган онасини кўриш учун клиникага келган. Томоқ оғриғи туфайли журналист Левофлоксацин (антибиотик) дорисидан бир дона ичган, орадан 10-15 дақиқа ўтиб эса унда тутқаноқ кузатилган ва ҳушини йўқотган.

Клиника шифокорлари томонидан аёлга биринчи ёрдам кўрсатилган ва у реанимация бўлимига ётқизилган. Кўрсатилган тиббий ёрдам натижасида у ҳушига келган ва аҳволи яхшиланган.

Бироқ 13 сентябр куни соат 16:00 ларда Ягафаровани такроран тутқаноғи тутиб, кўрсатилган тиббий муолажаларга қарамай соат 17:50 да биологик ўлим ҳолати қайд этилган.

Суд-тиббиёт экспертизаси маълумотларига кўра, журналистнинг ўлими «Доридан аллергик реакция. Бош мия, ўпка ўткир шишиши. Ўткир нафас, юрак қон-томир етишмовчилиги. Анафилактик шок» туфайли юзага келган.

Ҳолат юзасидан туман прокуратураси томонидан терговга қадар текширув ҳаракатлари олиб борилмоқда.