Куни кеча Davletov.uz телеграм каналида Энергетика вазирлиги ўтказган тендер юзасидан танқидий материаллар эълон қилинди. Ҳолат юзасидан Вазирлик матбуот хизмати расмий муносабат билдирди.

Унда таъкидланишича, ижтимоий ва давлат обектларига қуёш панеллари ўрнатиш ва уларга техник хизмат кўрсатиш учун жорий йилнинг март ойида танлов эълон қилинган ва танловда 18 та компания иштирок этган. Танлов комиссиясига энергетика вазири Жўрабек Мирзамаҳмудов раислик қилган.

Лойиҳа аҳоли ва давлат манфаатларини ҳимоя қилишни инобатга олган ҳолда ўтказилиши режалаштирилган эди. Аммо ғолиб бўлган компаниялар Wirtec Power ва Cifra B томонидан шартларнинг бажарилмагани учун улар билан шартномалар бекор қилинган.

Мажбуриятларни бажармаган компаниялар қуйидагича улушга эга.

• Тошкент шаҳридаги давлат ва ижтимоий соҳа объектлари учун 323 миллиард сўмлик қуёш батареялари етказиб бериш — Virtec Power.
• Тошкент шаҳри, Жиззах, Сирдарё вилоятлари ва Тошкент шаҳрининг Чилонзор туманидаги давлат ва ижтимоий соҳа объектларини қуёш батареялари билан таъминлаш — 275,8 млрд сўм — Virtec Power.
• Самарқанд, Навоий ва Бухоро вилоятларига қуёш батареяларини етказиб бериш — 272,6 млрд сўм — Virtec Power.
• Андижон, Фарғона ва Наманган вилоятлари объектлари учун 276,4 миллиард сўмлик қуёш панелларини етказиб бериш — Virtec Power.
• Қашқадарё ва Сурхондарё вилоятлари, шунингдек, Тошкент шаҳрининг Мирзо Улуғбек туманларига 390 миллиард сўмлик қуёш панелларини етказиб бериш — Cifra B.
• Қорақалпоғистон Республикаси ва Хоразм вилояти, шунингдек, Тошкент шаҳрининг Олмазор туманига 339 млрд сўмлик қуёш панелларини етказиб бериш — Cifra B.

Эндиликда умумий қуввати 2.5 Мвт бўлган стансияларни қуриш учун қайтадан танлов эълон қилинди. Кейинги босқичда лойиҳаларнинг асосий қисмини молиялаштириш халқаро молия институтлари ҳисобидан амалга иширилиши кўзда тутилган ва бу йўналишда музокалар олиб борилмоқда, — дейди Вазирлик матбуот хизмати.