Туркия Президенти Ражаб Тоййиб Эрдўғон миллиардер Илон Маскдан Туркияда Tesla заводини қуришни сўради. Бу ҳақда Anadolu агентлиги хабар берди.

Қайд этилишича, Эрдўғон ва Маск Ню-Йоркдаги Бирлашган Миллатлар Ташкилоти штаб-квартираси яқинида жойлашган «Турк уйи»да учрашган. Маск Туркия президенти билан учрашувга Х Æ А-12 исмли ўғлини ҳам олиб борган. Tesla раҳбари билан учрашувда Эрдўғон Туркиянинг технологик ютуқлари, Digital Türkiye’нинг қарашлари, миллий сунъий интеллект старатегияси ҳамда Туркия алоқа бошқармаси ҳақида маълумот берган. Президент шунингдек, Туркиянинг биринчи электромобили Togg ишлаб чиқарилгани билан бирга Tesla ҳам мамлакат бозорига кириб келганини таъкидлаб, Маскдан Туркияда Tesla’нинг еттинчи заводини очишни сўраган.

«Президент Эрдўғон, SpaceX билан ҳамкорлик қилиш имкониятлари Туркиянинг космик дастури доирасида кўрилган ва амалга оширилиши лозим бўлган қадамлар туфайли пайдо бўлиши мумкинлигини таъкидлаб, Маскни Измирда бўлиб ўтадиган Teknofest’га таклиф қилди», дейилади хабарда.

Ўз навбатида, Илон Маск ҳам туркиялик етказиб берувчилар аллақачон Tesla билан ишлаётгани, ушбу мамлакат кейинги завод очилиши учун асосий номзодлардан бири эканини маълум қилган.

Эрдўғоннинг SpaceX’нинг Starlink сунъий йўлдош хизмати ва сунъий интеллект соҳасида ҳамкорлик қилиш таклифига жавобан Маск Туркияда Starlink сунъий йўлдош хизматларини тақдим этиш учун зарур лицензияни олишда турк маъмурлари билан ҳамкорлик қилиш истагида эканликларини билдирган.