Эрдўғон Путин билан учрашиш учун Сочига учиб кетди
Давлат раҳбарлари дон йўлаги келишувини узайтириш бўйича музокара ўтказиши кутилмоқда.
ТАСС нашрининг Туркия президенти идорасидаги манбасига таяниб ёзишича, Ражаб Тоййиб Эрдўғон россиялик ҳамкасби Владимир Путин билан учрашиш учун Сочига жўнаб кетди. Музокаралар Москва вақти билан соат 13:00 да бошланиши режалаштирилган.
Фото: BBC
Жаноб Президент Сочига учиб кетди. Путин билан музокаралар соат 13:00да бошланиши кутилмоқда, — дейилади хабарда.
Икки давлат раҳбари ўртасидаги музокараларларнинг асосий мавзуси дон битими бўлиши режалаштирилган. 5 сентябр куни Эрдўғон Туркия ҳукумати аъзолари билан Россияга сафари натижаларини муҳокама қилмоқчилиги айтилди.
Euronews’нинг маълум қилишича, Туркия раҳбари Владимир Путинни Қора денгиз орқали ғалла етказиб бериш бўйича келишувга қайтишга шахсан ўзи ҳаракат қилиши мумкин.
Путин ва Эрдўғон Сочида муҳокама қилиши кутилаётган яна бир мавзу Украина қишлоқ хўжалиги маҳсулотларини экспорт қилиш учун Қора денгиздаги хавфсизлик йўлакларини тиклаш бўлади.
Москва июл ойида Ғарб давлатларини Россия учун бир қатор фундаментал шартларга риоя қилмаётганликда айблаб, келишувни узайтиришдан бош тортган. Кремл россиялик етказиб берувчиларнинг қишлоқ хўжалиги маҳсулотлари ва ўғитларини сотишига тўсқинлик қилувчи санкциялар ва чекловларни бекор қилишни талаб қилмоқда.
Сочидаги учрашув арафасида Путин, агар талаблари эшитилса, Москва келишувга қайтишга тайёрлигини айтиши кутилмоқда. Туркия ташқи ишлар вазири келишувнинг янгиланишини халқаро озиқ-овқат хавфсизлиги учун «муҳим» омил деб атади.
