Ижтимоий тармоқларда фарғоналик ўқитувчи қарздорлик сабаб қаттиқ калтаклангани ҳақидаги видеохабар тарқалди. Вилоят Ички ишлар бошқармаси ҳолат юзасидан муносабат билдирди.

Маълум қилинишича, воқеа кеча, 21 октябр куни Данғара тумани «Пишқарон» МФЙ ҳудудида содир бўлган. Мазкур ҳудуддаги балиқхона ёнида фуқаро М.М. таниши Д.Т. (видеохабардаги шахс) билан ўрталарида бўлган пул олди-бердиси масаласида ўзаро гап талашиб жанжаллашиб кетган.

Оқибатда М.М. Д.Т.нинг бош ва юз қисмига уриб, тан жароҳати етказган. Ҳодиса жойига туман ИИБ ходимлари етиб борган ҳамда ҳолат тегишли тартибда рўйхатга олинган.

Ҳозирда терговга қадар текширув ҳаракатлари олиб борилаётгани маълум қилинди.

«Мазкур ҳолат вилоят ИИБ раҳбарияти томонидан алоҳида назоратга олинган. Якунига кўра қонун устуворлиги, жазо муқаррарлиги таъминланади. Шунингдек, видеохабарда келтирилган М.М.нинг ИИО ходими Ж.Т.га қариндошлиги аниқланмади. Фуқароларимиздан интернет ижтимоий тармоқларида тарқалган юқоридаги каби хабарларга расмий муносабат билдирилмасдан туриб, турли ноўрин хулосага бормасликларини сўраб қоламиз», дейилади хабарда.