Самарқанд шаҳрида яшовчи 36 ёшли З.Н. ИИБга мурожаат қилиб, ижтимоий тармоқда жойлаштирган расмларини номаълум шахс юклаб олиб, уятли расмлари борлигини айтиб пул талаб қилганини маълум қилган. Суриштирувлар натижасида, пулларни ўзлаштирган шахс, Самарқанд шаҳрида яшовчи, 35 ёшли Т.У. экани аниқланган.

Т.У. «Одноклассники» ижтимоий тармоғида З.Н. жойлаштирган фотосуратларини монтаж қилиб, уятли кўринишга келтирган ва уларни интернетда тарқатмаслик эвазига 6 500 доллар, Apple iPhone 13 Pro ва эркаклар тилла занжирини талаб қилган.

Ҳолат юзасидан, Т.У.га нисбатан Жиноят кодексининг 168-модда 3-қисми билан жиноят иши қўзғатилиб, тергов ҳаракатлари олиб борилмоқда. Қонунга мувофиқ, Т.У. томонидан содир этилган жиноий ҳаракатлар учун 5 йилдан 8 йилгача озодликдан маҳрум қилиш жазоси назарда тутилган.