Олий Суд матбуот хизматининг хабар беришича, фуқаро Камолова ўтган йили куз фаслида Фарғона вилояти Ўзбекистон тумани ҳудудида жойлашган дала майдонида ёввойи наша ўсимликлари баргларини гиёҳвандлик воситаларини тайёрлаш мақсадида териб, яшаш уйига ташиб келган.

Aёл ўсимликка ишлов бериш орқали гашиш гиёҳвандлик воситаси ҳолатига келтириб, сотишни режа қилган. У жиноий шериги Абдубатаева билан олдиндан тил бириктириб, иккови ушбу гиёҳвандлик воситасини сотиш учун 2023 йил феврал ойида Ўзбекистон туманидан Бешариқ туманига боришган. Улар соф оғирлиги 0,60 грамм бўлган гашиш моддасини махсус харидорга сотаётган вақтда қўлга олинди.

Жиноят ишлари бўйича Бешариқ туман судининг ҳукми билан Жиноят кодексининг 273-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек, уларни қонунга хилоф равишда ўтказиш) да назарда тутилган жиноятни содир этган икки нафар аёлга нисбатан тўрт йилга озодликни чеклаш жазоси қўлланилган.