Кўнгилли қутқарувчилар ва жабрланганларнинг қариндошлари бутунлай сув остида қолган Херсон вилояти Олешкова туманидаги Леве Солонци қишлоғи аҳолисини зудлик билан эвакуация қилиш зарурлигини билдирмоқда. Бу ҳудуд Россия томонидан босиб олинган ҳудуд ҳисобланади.

Кўнгиллиларнинг маълум қилишича, одамлар бир кундан кўпроқ вақт давомида оғир аҳволда қолган. Улар ёрдам кутиш чоғида томларга чиқиб олишмоқда. Қурбонлар ҳақида хабарлар бор.

Ёрдамга муҳтож одамлар ҳақидаги маълумотлар бир неча кун олдин Фавқулодда вазиятлар вазирлигига етказилган. Кўнгиллилар бир кун аввал яна сўров юборишган, бироқ ҳозирча ҳокимият томонидан ҳудудга қутқарувчилар юборилгани ҳақида тасдиқланган маълумот йўқ.

9 июн куни Фавқулодда вазиятлар вазирлиги Леве Солонцига кетгани ҳақида хабарлар тарқади. Аммо бу маълумот ҳозирча тасдиқланмади.

Кўнгиллилар у ерда ҳарбий амалиётлар кетаётганлиги сабаб бора олмаётганларини маълум қилган. Улар одамлар бугун ташқарига чиқарилмаса, ҳалок бўлишларидан хавотирда.

8 июн куни кўнгиллилар Олешки шаҳридаги Нижная кўчасида сув тошқини пайтида ҳалок бўлган 30 дан ортиқ одам ҳақида маълумот беришди. Уларнинг сўзларига кўра, россиялик қутқарувчилар аҳолининг ҳужжатларини текширган, Украина паспортини тақдим этганларга ёрдам бермаган. Ўз қайиқларида шаҳарга киришга уринган кўнгиллиларга тўсқинлик қилинган ва қайиқларни Фавқулодда вазиятлар вазирлиги вакилларига бериш буюрилган.