Асосий ставкани кўриб чиқиш бўйича Марказий банк Бошқарув йиғилиши қарори юзасидан 4 май куни ўказилган матбуот анжуманида иштирок этган Bugun.uz мухбири хабар беришича, Марказий банк раиси Мамаризо Нурмуродов Humo ва Uzcard банкоматлари 10 кун ичида икки тизим карталарини қабул қилишни бошлашини маълум қилган.

Мамаризо Нурмуродовга кўра, илгари банкомат ва терминалларда чекловлар мавжуд бўлган бўлса, эндиликда бир терминал ҳам Uzcard, ҳам Humo карталарига хизмат кўрсатиш мумкин бўлади.  Ҳозирда айрим банкоматларда ушбу тизим синовлари ўказилмоқда.

«Humo ва Uzcard тўлов тизимлари банкоматларининг ўзаро интеграцияси бўйича ишлар якунланган. Яқин 7-10 кун ичида бутун Ўзбекистон бўйлаб Humo ва Uzcard терминал ва банкоматлари иккала турдаги карталарни қабул қила  олади. Ҳеч қандай муаммо йўқ, мақсадимиз нақд пул ечиб олиш бўйича хизматлар кўрсатиш эмас, балки банкоматларнинг функционаллигини бир-бири билан бирлаштиришдир», — деди Мамаризо Нурмуродов.

Эслатиб ўтамиз, 2023 йилнинг январь ойида Марказий банк раҳбари Humo ва Uzcard тўлов тизимлари узоқ музокаралардан сўнг ўзаро интеграция бўйича келишувга эришганини маълум қилганди.

Аввалроқ Марказий банк P2P ўтказмаларини Солиқ қўмитаси назорат қилишига мутлақо қарши эканлиги ҳақида хабар берилганди.