Ўзбекистоннинг Ҳиндистондаги элчихонаси кўмагида Ўзбекистон Транспорт вазирлиги ва Ҳиндистоннинг IndiGo авиакомпанияси масъул ходимлари ўртасида онлайн-музокаралар ташкил этилди, деб хабар берди «Дунё» агентлиги.

Мулоқот чоғида хорижий авиакомпанияларни Ўзбекистон авиация бозорига жалб этиш, улар учун қулай шароитлар яратиш бўйича кўрилаётган чоралар-тадбирлар, тақдим этилаётган имтиёзлар ҳақидаги батафсил маълумотлар тақдим этилди.

IndiGo авиакомпаниясининг халқаро ҳамкорлик масалалари бўйича вице-президенти Ражан Малҳотра мазкур компания фаолияти, янги хорижий манзиллар қамровини кенгайтириш бўйича кўрилаётган чора-тадбирлар хусусида сўзлаб берди.

Музокараларнинг навбатдаги босқичини ташкил этиш мақсадида IndiGo авиакомпанияси вакилларининг яқин муддатларда Ўзбекистонга амалий сафарини ташкил этишга келишиб олинди.

Аввалроқ Хитойнинг China Southern Airlines авиакомпанияси Пекин ва Тошкент ўртасида тўғридан-тўғри мунтазам қатновларни тиклаётгани ҳақида хабар берилганди. Шунингдек, Туркиянинг Turkish Airlines авиакомпанияси Истанбулдан Бухорога мунтазам авиарейслар йўлга қўйиши, Озарбайжондан Самарқандга авиақатновлар йўлга қўйиши ҳақида маълум қилинганди.