Ислом тараққиёт банки Ўзбекистондаги мактабларни таъмирлашга маблағ ажратади
Мамлакатда ҳозирда таъмирталаб мактаблар сони 1250 тани ташкил этади
Мактабгача ва мактаб таълими вазири Ҳилола Умарова Ислом тараққиёт банки Марказий Осиё минтақавий ваколатхонаси таълим шўбаси раҳбари Муҳаммад Мирзаи Каҳаги, Таълим учун глобал ҳамкорлик (GPE) ташкилотининг ҳудудий раҳбари Лина Бенете ҳамда UNICEF ташкилотининг Ўзбекистондаги ваколатхонаси раҳбари Мунир Маммедзаде билан учрашди. Бу ҳақда вазирлик матбуот хизмати хабар берди.
Қайд этилишича, учрашув давомида томонлар Ислом тараққиёт банки томонидан ажратилиши режалаштирилаётган маблағдан фойдаланишда асосий вазифалар ҳамда режаларни белгилаб олган.
Музокаралар натижасига кўра, Ислом тараққиёт банки томонидан таъмирталаб мактабларда таъмир ишларини амалга ошириш, янги мактаблар ва спортзаллар қуришга маблағ ажратилишига келишиб олинган.
Мазкур соҳа учун GPE томонидан ҳам қўшимча маблағ ажратилиши кўзда тутилган.
Маълумот учун, ҳозирги кунда Ўзбекистонда фаолият кўрсатаётган 10 104 та мактаб жами 5,2 миллион ўқувчи ўрнига эга бўлса-да, амалда ушбу мактабларда 6,3 миллион ўқувчи таҳсил олмоқда.
Ҳозирда таъмирталаб мактаблар сони 1250 тани ташкил этади.
Мавзуга доир: Ўзбекистон мактабларида 100 мингта тўгарак ташкил этилади. Бунга бюджетдан салкам 80 млрд сўм ажратилган
Аввалроқ ҳукумат қарори билан Таълим муассасалари учун матбаа маҳсулотлари хавфсизлиги талабларини белгилашнинг умумий техник регламенти тасдиқланганди.
