Ўзбекистондаги демографик ўзгаришлар ва пенсия ёшидагилар сонининг кўпайиши мазкур тизимни ислоҳ қилиш заруриятини туғдирмоқда. Бу ҳақда Жаҳон банки хабар берди.

Банк ўзининг Ўзбекистон ҳукумати сўрови билан тайёрлаган ҳисоботида келтиришича, мамлакат — пенсия ёши аёллар учун 55, эркаклар учун 60 ёшни ташкил этган собиқ иттифоқ ҳудудидаги ягона давлат.

«Пандемия ва юқори ишсизлик даврида пенсия ёшини оширишни бошлаш тавсия этилмайди. Аммо амалиёт шуни кўрсатадики, қарор қабул қилинган пайтдан бошлаб пенсия ёшидаги ходимлар ҳаёт режаларини ўзгартиришга мослашишлари учун вақт бериш тавсия этилади», дейилади ҳисоботда.

Жаҳон банки бу борада 2025 йилдан бошлаб пенсия ёшини секин-аста (йилига 3–4 ой) 65 ёшгача оширишни назарда тутувчи 2021–2030 йилларга мўлжалланган Миллий ижтимоий ҳимоя стратегияси доирасида қарор қабул қилишни таклиф этмоқда.