13 ноябрь куни Ўзбекистон мусулмонлари идораси томонидан Республикадаги масжидларда хизмат қилаётган имомлар ўртасида «Йил имоми-2024» танловининг финал босқичи ўтказилди. Унда Қорақалпоғистон Республикаси, вилоятлар ва Тошкент шаҳридан ғолиб чиққан 14 нафар имом-хатиб ва ноиблар қатнашди.

Танловда иштирокчилар қуйидаги соҳалар бўйича билим ва маҳоратларини синовдан ўтказди:

• Қуръони карим қироати ва тафсири;
• Ақида, фиқҳ, Ислом тарихи ва ҳадис илми;
• ОАВда эълон қилинган ижодий ва амалга оширилган муҳим ишлар.

Имомлар чиқишлари уларнинг хизматлари ва жамоат олдидаги фаолиятларидан келиб чиқиб баҳоланган. Ҳар бир иштирокчи ҳайъат томонидан белгиланган мезонларга кўра баҳоланган.

Ғолиблар ва мукофотлар

• 1-ўрин – Намангандан «Ҳомиддин қори» масжиди имом-хатиби Муҳаммад Бобир Насриддиновга I даражали диплом ва Ҳаж сафари йўлланмаси берилди.
• 2-ўрин – Тошкентдан «Фирдавс» масжиди имом-хатиби Бахтиёр Сатторовга II даражали диплом ва 16 миллион сўм пул мукофоти топширилди.
• 3-ўрин – Тошкент вилоятидан «Чаноқ» масжиди имом-хатиби Ёқуб Бухарбаевга III даражали диплом ва 13 миллион сўм мукофот берилди.

«Йилнинг энг фидойи имоми» унвони Қорақалпоғистон Республикасидан «Мулла Исҳоқ» масжиди имоми Алтинбек домла Зинуллаев ва Хоразм вилоятидан «Мирҳошим бобо» масжиди имоми Оллаберган Ғойиповга берилди.

2023 йилда ушбу танловда Тошкентдан «Холид ибн Валид» масжиди имом-хатиби Исроилжон домла Исмоилжонов биринчи ўринни эгаллаб, Ҳаж сафари йўлланмасига сазовор бўлганди.