«ЖСТ талаблари ислоҳотларимиз мазмунига тўла мос» — Шавкат Мирзиёев
Президентнинг маълум қилишича, Ўзбекистон ушбу нуфузли ташкилотга тезроқ аъзо бўлиб киришдан манфаатдор
Шавкат Мирзиёев Халқаро конгресс марказида бўлиб ўтган иккинчи Тошкент халқаро инвестиция форумининг ялпи мажлисида нутқ сўзлади.
Президент матубот хизматининг хабар беришича, ташқи савдони эркинлаштириш бўйича навбатдаги муҳим қадамлар қўйилган.
Жумладан, инвесторлар учун зарур бўлган 7 мингдан зиёд хомашё ва товарларга божхона божлари бекор қилинди.
Божхона ҳудудида қайта ишлашнинг соддалашган тартиби жорий этилди.
Ташқи савдо ва рақобат муҳитини янги босқичга олиб чиқиш, янги-янги бозорларга кириш мақсадида Ўзбекистон Жаҳон савдо ташкилотига қўшилиш борасидаги ишларни жадаллаштирди.
«Алоҳида таъкидлаб ўтмоқчиман, Жаҳон савдо ташкилоти талаблари ислоҳотларимиз мазмунига тўла мос ва биз ушбу нуфузли ташкилотга тезроқ аъзо бўлиб киришдан манфаатдормиз», — деди Президент.
Қайд этилишича, ҳозир аъзо мамлакатлар билан музокаралар олиб бориш ҳамда миллий қонунчиликни Жаҳон савдо ташкилоти қоидалари билан уйғунлаштириш қизғин босқичда.
